ޖަސްޓިސް ރިޓަޔަރޑް އަލްއުސްތާޛް ޢައްބާސް ޝަރީފަކީ ދިވެހިރާއްޖޭގެ 5 ވަނަ ޕްރޮސިކިއުޓަރ ޖެނެރަލްއެވެ.

ޕްރޮސިކިއުޓަރ ޖެނެރަލްގެ މަޤާމަށް އެމަނިކުފާނު އައްޔަންކުރައްވައި މަޤާމުގެ ހުވައި ކުރެއްވީ 18 ސެޕްޓެންބަރު 2024 ގައެވެ. އަލްއުސްތާޛް ޢައްބާސް ޝަރީފު ޤާނޫނީ ދާއިރާއިން މަތީ ތަޢުލީމު ޙާޞިލުކުރެއްވީ އޮސްޓްރޭލިއާގެ ޔުނިވަރސިޓީ އޮތް ޓެސްމޭނިއާ އިންނެވެ. އެމަނިކުފާނުވަނީ އެ ޔުނިވަރސިޓީން ބެޗްލަރ އޮފް ލޯސް ޙާޞިލުކުރައްވާފައެވެ.

އަލްއުސްތާޛް ޢައްބާސް ޝަރީފު ޤާނޫނީ ދާއިރާއިން ޚިދުމަތް ކުރައްވަން ފެއްޓެވީ 2000 ވަނަ އަހަރު ރައީސުލްޖުމްހޫރިއްޔާގެ އޮފީހުގެ އެސިސްޓެންޓް ލީގަލް އޮފިސަރެއް ގޮތުގައެވެ. އަލްއުސްތާޛް ޢައްބާސް ޝަރީފު ރައީސުލްޖުމްހޫރިއްޔާގެ އޮފީހުގައި ޚިދުމަތްކުރެއްވި 8 އަހަރު ތެރޭގައި އެމަނިކުފާނު ވަނީ މުހިންމު ޤައުމީ މަސައްކަތްތަކުގައި ބައިވެރިވެވަޑައިގެންފައެވެ. އެގޮތުން މިހާރު ޢަމަލުކުރަމުންދާ ޤާނޫނުއަސާސީ ޑްރާފްޓްކުރުމާއި، ޤާނޫނުއަސާސީ ތަސްދީޤުކުރެއްވުމުގެ ކުރިން ޤާނޫނުއަސާސީ ދިރާސާކުރައްވައި، ރައީސުލްޖުމްހޫރިއްޔާއަށް ބޭނުންފުޅުވާ ޤާނޫނީ ލަފާ ތައްޔާރުކުރެއްވުމުގައި އެމަނިކުފާނުވަނީ މުހިންމު ދައުރެއް އަދާކުރައްވާފައެވެ. އަދި އޭރު ޤައުމީ މުހިންމު ކަންކަމާ ގުޅިގެން ރައީސުލްޖުމްހޫރިއްޔާ އުފެއްދެވި ރިޔާސީ ކޮމިޝަންތަކުގެ ސެކްރެޓޭރިއޭޓްގައި އެންމެ އިސް އެއްފަރާތެއްގެ ގޮތުގައިވެސް އެމަނިކުފާނުވަނީ މަސައްކަތް ކުރައްވާފައިވެއެވެ. އަލްއުސްތާޛް ޢައްބާސް ޝަރީފު ރައީސުލްޖުމްހޫރިއްޔާގެ އޮފީހުގައި މަސައްކަތްކުރެއްވި ދުވަސްވަރު، ޖުޑީޝަން ސަރވިސް ކޮމިޝަނަށް ރައީސުލްޖުމްހޫރިއްޔާ ކަނޑައަޅުއްވާ މެންބަރުކަމާއި، އެ ކޮމިޝަންގެ ނާއިބު ރައީސްގެ މަޤާމު އަދާކުރައްވާފައިވެއެވެ.

2000 ވަނަ އަހަރުން ފެށިގެން 2008 ވަނަ އަހަރާ ހަމައަށް ދައުލަތުގެ އެކި މަޤާމުތަކުގައި މުހިންމު ޚިދުމަތްތަކެއް ކުރެއްވުމަށްފަހު، އެމަނިކުފާނު އަމިއްލަ ޤާނޫނީ މަސައްކަތްތަކުގައި މަޝްޢޫލުވެވަޑައިގެންނެވިއެވެ. އެގޮތުން ދިވެހިރާއްޖޭގެ ބައެއް ބޮޑެތި ލޯ ފާރމްތަކުގައި ޕާރޓްނަރެއްގެ ގޮތުގައި މަސައްކަތް ކުރެއްވުމަށްފަހު އަމިއްލަ ލޯ ފަރމެއް އުފައްދަވައި، ވަޒީފާއާބެހޭ މައްސަލަތަކާއި، މަދަނީ އަދި ދުސްތޫރީ ބޮޑެތި މައްސަލަތަކުގައި ޤާނޫނީ ވަކީލެއް ގޮތުގައި ދިވެހިރާއްޖޭގެ ހުރިހާ މަރުޙަލާއެއްގެ ކޯޓުތަކުގައި ވަކާލާތުކުރައްވާފައިވެއެވެ.

އަލްއުސްތާޛް ޢައްބާސް ޝަރީފުވަނީ 2011 މާރިޗު މަހުން ފެށިގެން 2015 ސެޕްޓެންބަރުގެ ނިޔަލަށް ދިވެހިރާއްޖޭގެ ހައިކޯޓުގެ ފަނޑިޔާރުކަން ކުރައްވާފައެވެ. ދިވެހިރާއްޖޭގެ ހައިކޯޓުގައި މަސައްކަތްކުރެއްވި ދުވަސްވަރު، އެކޯޓުން ނިންމެވި މުހިންމު މައްސަލަތަކުގެ ބެންޗުގައި ހިމެނިވަޑައިގެން ރަޢުޔު ލިޔުއްވުމުގެ އިތުރުން، ދިވެހިރާއްޖޭގެ ހައިކޯޓުގެ މަސައްކަތްތައް ޒަމާނީކޮށް އަދާހަމަކުރުމުގައި އިސް ދައުރެއް އަދާކުރެއްވިއެވެ. ސެޕްޓެންބަރު 2015 ގައި ދިވެހިރާއްޖޭގެ ހައިކޯޓުގެ ފަނޑިޔާރުކަމުން ޝަރަފުވެރިކަމާއެކު ރިޓަޔަރކުރެއްވުމަށްފަހު، އަލްއުސްތާޛް ޢައްބާސް ޝަރީފު އަމިއްލަ ޤާނޫނީ މަސައްކަތައް އަލުން ރުޖޫޢަވެވަޑައިގެން ޤާނޫނީ ދާއިރާގައި ޚިދުމަތްކުރެއްވުމުގައި ދެމި ހުންނެވިއެވެ.

އަލްއުސްތާޛް ޢައްބާސް ޝަރީފު ރައީސުލްޖުމްހޫރިއްޔާގެ އޮފީހުގެ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެންޑް ޕާލަމެންޓަރީ އެފެއާޒްގެ މަޤާމަށް 17 ނޮވެންބަރު 2023 ގައި އައްޔަންކުރެވުމާއެކު، އަލުން ދައުލަތަށް ޚިދުމަތްކުރައްވަން ފެއްޓެވިއެވެ. އެ މަޤާމު އަދާކުރެއްވި މުއްދަތުގައި މޯލްޑިވްސް އިންޓަރނޭޝަނަލް ފައިނޭންޝިއަލް ސަރވިސް އޮތޯރިޓީގެ ގަވަރނިންގ ބޯޑުގެ މެންބަރުކަން ކުރައްވާފައިވެއެވެ. 18 ސެޕްޓެންބަރު 2024 ދުވަހު ޕްރޮސިކިއުޓަރ ޖެނެރަލްގެ މަޤާމަށް އައްޔަންކުރެވުމާ ހަމައަށް އެމަނިކުފާނު ހުންނެވީ އެ މަޤާމުގައެވެ.

ޕްރޮސިކިއުޓަރ ޖެނެރަލްގެ ހައިސިއްޔަތުން އަލްއުސްތާޛް ޢައްބާސް ޝަރީފު އިސްކަން ދެއްވަނީ ޕްރޮސިކިއުޓަރ ޖެނެރަލްގެ އޮފީހަކީ، ދުނިޔޭގެ ނިސްބަތުން ފާހަގަކޮށްލެވޭ، މިނިވަން، މުސްތަޤިއްލު މުއައްސާސާއެއްގެ ގޮތުގައި ދެމެހެއްޓުމާއެކު، އޮފީހުގެ އިދާރީ އޮނިގަނޑު އިސްލާޙްކޮށް، އޮފީހުގެ މަސައްކަތްތައް އިތުރަށް ހަރުދަނާކުރުމަށާއި، އޮފީހުގެ މުވައްޒަފުންގެ ފަންނީ ޤާބިލުކަން އިތުރުކުމަށާއި، އަދި އޮފީހުން ދޭ ޚިދުމަތްތަކަކީ އަވަސް އަދި ފަސޭހަ ޚިދުމަތްތަކަކަށް ހެދުމަށެވެ.

ޖަސްޓިސް ރިޓަޔަރޑް އަލްއުސްތާޛް ޢައްބާސް ޝަރީފަކީ ދިވެހިރާއްޖޭގެ ޤާނޫނީ ދާއިރާގައި 26 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ޤާނުނީ ފަންނުގެ ތަޖުރިބާކާރެކެވެ. ދިވެހިރާއްޖޭގެ ސުޕްރީމް ކޯޓާއި ހައިކޯޓު ހިމެނޭގޮތުން، ދިވެހިރާއްޖޭގެ ޝަރުޢީ ހުރިހާ ކޯޓުތަކެއްގައި ވަކާލާތުކުރުމުގެ ހުއްދައޮތް ޤާނޫނީ ވަކީލެކެވެ. އަދި އެމަނިކުފާނަކީ މޯލްޑިވްސް އިންޓަރނޭޝަނަލް އާރބިޓްރޭޝަން ސެންޓަރުގެ ސެކަންޑްރީ ލިސްޓު އޮފް އާރބިޓްރޭޓަރސްގައި ހިމެނިވަޑައިގަންނަވާ އާބިޓްރޭޓަރެކެވެ.

Our Leadership

Justice (Retired) Uz. Abbas Shareef

Uz. Mahmood Saleem

Uza. Aishath Mohamed

Uz. Hussain Nashid

Uza. Shamra Shameem

Uz. Abdulla Rabiu

Uza. Mariyam Fazleen

Uz. Hussain Samy

Aminath Waheedha

Siyanath Hashim