ކުޑަކުދިން ކުށަށް ހުށަހެޅޭ މިންވަރު މަދުކުރުމަށްޓަކައި ކޮށައިދިން ފުރަތަމަ މަގު

ކުޑަކުދިންނަކީ ޤައުމެއްގެ މުސްތަޤުބަލެވެ. ހެޔޮ މުޖުތަމަޢައެއް ބިނާކުރުމަށްޓަކައި ކުރަންޖެހޭ މުހިންމު އެއް މަސައްކަތަކީ ރަނގަޅު ޖީލެއް ބިނާކުރުމެވެ. ކުޑަކުދިން ހެދި ބޮޑުވަމުން އަންނަ އިރު އެކުދިންގެ ވިސްނުމާއި، ޚިޔާލާއި، ފިކުރާއި، ޢަމަލުތައް ބައްޓަންވެގެންދާނީ އެކުއްޖާ ތަޖުރިބާ ކުރާ ކަންކަމުގެ މައްޗަށެވެ. ދިރިއުޅޭ މާހައުލުންނާއި، ތަޢުލީމް ހާސިލްކުރަންދާ ތަންތަނުންނާއި، މުޖުތަމަޢުންނާއި، އިންޓަރނެޓުން ދަސްވާ ކަންކަމަކީ ކުއްޖާގެ ވިސްނުން ތަރައްޤީވުމުގައި ކޮންމެވެސް ހިއްސާއެއް އަދާކުރާނެ ކަންކަމެވެ. ޢަމަލުތައް ތަރުތީބުވާނީ އެކުއްޖެއްގެ ހުރި ވިސްނުމެއްގެ މައްޗަށެވެ. ކުދިން ހެދި ބޮޑުވަމުން އަންނަ އިރު، އެކުދިންނަށް ރަނގަޅު ތަރުބިއްޔަތެއް ދީ ރީތި ނަމޫނާއެއް ދައްކައިދޭން ޖެހެނީ މި ސަބަބަށްޓަކައެވެ. އެހެންނަމަވެސް ވިސްނާލުން މުހިންމު ކަމަކީ، ކޮންމެ ކުއްޖަކީ މި ނަޞީބު ލިބިގެންވާނެ ކުއްޖެއް ނޫންކަމެވެ.

ހަގު އުމުރަކުން ފެށިގެން ކުށުގެ މާހައުލަކަށް ހުށަހެޅިފައިވާ ކުއްޖެއްގެ ވިސްނުމާ ދުވަހަކުވެސް އެފަދަ ކަމެއް ތަޖުރިބާ ނުކުރާ ކުއްޖެއްގެ ވިސްނުމާ އެއްގޮތެއް ނުވާނެއެވެ. ހަމަ އެގޮތަށް އިޖުތިމާޢީ ގޮތުން ގަޑުބަޑުވެފައިވާ ޢާއިލާއެއްގެ ތެރޭގައި ބޮޑުވާ ކުއްޖަކާ ދުވަހަކުވެސް ޢާއިލީ ހަމަނުޖެހުމެއް ތަހައްމަލު ކުރަން ނުޖެހޭ ކުއްޖަކާވެސް ވިސްނުން އެއްގޮތެއް ނުވާނެއެވެ. ދިމާވާ ކަންކަމާއި، އެކުވެ އުޅުމަށް ޚިޔާރުކުރާ މީހުންވެސް އެއްގޮތެއް ނުވާނެއެވެ. ޢާންމު ގޮތެއްގައި، ކުޑަކުދިން ކުށަކަށް ހުށަހެޅިގެންދަނީ އެކުއްޖާއަށް ބޭނުންވާ ފުރިހަމަ ރައްކާތެރިކަން ދިނުމުގައި ކޮންމެވެސް ބަޔަކު އިހުމާލުވެގެންނެވެ. އެއީ މައިންބަފައިންކަމަށް ވިއަސް، މުދައްރިސުންކަމަށްވިއަސް ނުވަތަ މުޖުތަމަޢުކަމަށްވިއަސް މެއެވެ. މައިންބަފައިންގެ މައްޗަށް އޮތް އެންމެ އިސް ޒިންމާއަކީ ކުދިން ހެޔޮ ގޮތުގައި ތަރުބިއްޔަތުކޮށް، އެކުދިންނަށް ބޭނުންވާ އަޅާލުމާއި ރައްކާތެރިކަން ފޯރުކޮށްދީ ދިރިއުޅުމުގެ އަސާސީ ބޭނުންތައް ފުއްދައިދިނުމެވެ. މިކަމުގައި އިހުމާލު ވެވިއްޖެނަމަ އަޅާލުމާއި ރައްކާތެރިކަން ހޯދޭނެ އެހެން މަގެއް ކުދިން ޚިޔާރުކޮށްފާނެއެވެ. ހަމައެގޮތަށް ކުދިންގެ ބޭނުންތައް ފުއްދައިދޭނެ އެހެން ބަޔަކު ހޯދަފާނެއެވެ. ތަޢުލީމް ހާސިލްކުރަންދާ މަރުކަޒަކީ ކުއްޖާގެ ދެވަނަ ގެއެވެ. ގެއެއްގެ ތެރޭގައި ކުއްޖާއަށް ލިބެންޖެހޭ ރައްކާތެރިކަން ސްކޫލް މާހައުލުންވެސް ލިބެންޖެހެއެވެ. ނުލިބިއްޖެނަމަ މި ގެއަކަށް ކުއްޖާ ނުދާނެއެވެ. ފޫހިފިލުވާލަން ހޯދާނީ އެހެން މަގެކެވެ. މުޖުތަމަޢު ގެ މައްޗަށް އޮތް ޒިންމާއަކީ ކުޑަކުދިންނަށް އަޅާލައި، އޯގާތެރިވެ، އެކުދިން ނާޖައިޒް ބޭނުން ނުހިފުމެވެ. މުޖުތަމަޢު ތެރޭގައި އުޅޭ އެންމެނަކީ މިކަން ދަނެގެން، ކުދިންނާމެދު ރަނގަޅު ނިޔަތެއް އޮންނާނެ ބައެއް ނޫނެވެ. ކުޑަކުދިންނަކީ، ވަކިން ޚާއްޞަކޮށް، އަޅާލުމާއި ރައްކާތެރިކަން ބޭނުންވާ ޚާއްޞަ ހާލަތްތަކުގައި ތިބޭ ކުދިންނަކީ ހައްލާލަން ފަސޭހަ، މުޖުރިމަކު ކުށް ކުރަން ޚިޔާރުކުރާނެ އެންމެ ވަރުގަދަ ހަތިޔާރެވެ.

މިކަން މިގޮތަށް ވިޔަ ނުދިނުމަށްޓަކައި، ކުޑަކުދިންގެ ނާޖާއިޒް ބޭނުން ހިފުމާއި، އެކުދިން ބޭނުންކޮށްގެން ކުށް ކުރުމާއި، ކުށެއް ކުރުވުމުގައި އެއްވެސް ހައިސިއްޔަތުން އެކުދިން ބައިވެރިކުރުވުމަށް މަސައްކަތްކުރުމަކީވެސް ކުށެއްގެ ގޮތުގައި ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގައި ކަނޑައަޅާފައިވެއެވެ. މިއީ ކުޑަކުދިން ކުށް ކުރުވުމުން ދުރު ކުރުމަށްޓަކައި އެޅުނު ފުރަތަމަ ޤާނޫނީ ބިންގަލެވެ. މިފަދަ ކުށެއް ތަޙްޤީޤު ކުރުމަކީ ފަސޭހަކަމެއް ނޫނެވެ. ބޮޑު މީހެއްގެ އަތްދަށުވެ ވިކްޓިމައިޒްވެފައިވާ ކުޑަކުއްޖާއަކީ މުއައްސަސާތަކަށް އިތުބާރުކޮށްގެން ތަޙްޤީޤުތަކަށް އެއްބާރުލުންދޭނެ ކުއްޖެއް ނޫނެވެ. އެކުއްޖާއަށް ގާތްވާނީ، އެކުއްޖާގެ ބޭނުންތައް ފުއްދައިދީގެން އެކުއްޖާއަށް "އަޅާލުމާއި ރައްކާތެރިކަން" ދިން މީހާއެވެ. ވީމާ، މި ބާވަތުގެ ކުށެއްގައި ދަޢުވާއެއް ކުރުމަށްޓަކައި ވިކްޓިމައިޒްވެފައިވާ ކުއްޖާއާ މިނިވަންކޮށް، ހެކި ހޯދޭތޯ ފުލުހުން މަސައްކަތްކުރަން ޖެހެއެވެ. ތަޙްޤީޤީ އުކުޅުތައް ބޭނުންކޮށްގެން، ތަޙްޤީޤު ބައްޓަންކުރަންވީ ގޮތުގެ އިރުޝާދެއް މިއޮފީހުންވާނީ ފުލުހުންނަށް ދީފައެވެ. މިއީ ކުޑަކުދިންގެ ނާޖާއިޒް ފައިދާ ނަގައި، އެކުދިން ލައްވައި ކުށް ކުރާ މީހުން ޢަދުލު އިންޞާފުގެ ކުރިމައްޗަށް ގެނައުމަށްޓަކައި ފުލުހުން ކުރަންޖެހޭ މަސައްކަތްތައް ހަރުދަނާ ކުރުމަށްޓަކައި މިއޮފީހުން ކޮށައިދިން ފުރަތަމަ މަގެވެ.